KIA အဖွဲ့ ထောင်ထားသော မိုင်းနင်းမိပေါက်ကွဲရာ ဒေသခံအမျိုးသမီးတစ်ဦး သေဆုံး

သြဂုတ် ၂၇ ရက်၊ ၂၀၁၄ ခုနှစ်

ကချင်ပြည်နယ်၊ မိုးမောက်မြို့နယ်၊ ကုန်းနှောကျေးရွာအနီးတွင် ယမန်နေ့က ကချင်လွတ်မြောက်ရေး တပ်မတော် (KIA)အဖွဲ့ ထောင်ထားသော မိုင်းတစ်လုံး နင်းမိပေါက်ကွဲရာ ဒေသခံအမျိုးသမီးတစ်ဦး နေရာ၌ ပွဲချင်းပြီး သေဆုံးခဲ့ကြောင်း သတင်းရရှိသည်။

အဆိုပါဖြစ်စဉ်မှာ ဒွန်ဘုံကျေးရွာနေ အမျိုးသမီးတစ်ဦးသည် ကုန်းနှောရွာနေ ဖခင်ဖြစ်သူ မကျန်းမာ၍
သွားရောက် ကြည့်ရှု့ပြီး ပြန်လာစဉ် မိုင်းနင်းမိသေဆုံးရခြင်းဖြစ်ကြောင်း သိရသည်။

“ မိုင်းကွဲသံကြားလို့ သွားကြည့်တော့ နေရာမှာပဲ ပွဲချင်းပြီး သေနေတာတွေ့တယ်၊ ဒီရွာကမဟုတ်ဘူး၊ နောက်မှ ဒွန်ဘုံရွာက အမျိုးသမီးဆိုတာ သိရတာ ” ဟု ကုန်းနှောရွာသားတစ်ဦးက ပြောသည်။

KIA အဖွဲ့မှ ထောင်ထားသော မိုင်းနင်းမိပေါက်ကွဲမှုကြောင့် သေဆုံးသွားသော အမျိုးသမီးမှာ ဒေါ်ဖော်ယုတောင် (၄၈)နှစ်၊(ဘ) ဦးဖော်ယုဝမ်၊ ကချင်/ခရစ်ယာန်၊ ဒွန်ဘုံကျေးရွာ၊ မိုးမောက်မြို့နယ်နေသူ ဖြစ်ကြောင်း သိရပါသည်။

၎င်းမိုင်းပေါက်ကွဲဖြစ်စဉ် ဖြစ်ပွားခဲ့သော နမ့်ဆန်ချောင်း(ခ) ဆမားချောင်းသည် ဒွန်ဘုံကျေးရွာနှင့် ကုန်းနှော ကျေးရွာကြားတွင်ရှိပြီး KIA တပ်ရင်း(၂၅)နယ်မြေဖြစ်ကြောင်းနှင့် KIA တပ်ဖွဲ့ဝင်များ လှုပ်ရှားသွားလာလျက် ရှိကြောင်း ဒွန်ဘုံရွာသားတစ်ဦးက ဆိုသည်။

“ မိုင်းနင်းမိလို့ လူသေတာကို KIA အဖွဲ့က ဂရုတောင် မစိုက်ပါဘူး၊ သူတို့ ထောင်ထားတဲ့ မိုင်းကို အပြစ် မရှိတဲ့ ဒေသခံတစ်ဦးက နင်းမိပြီး သေရတာပါ၊ အဲဒီအတွက် ကျန်ရစ်သူ မိသားစုကို တောင်းပန်တာမျိုး၊ ထောက်ပံ့ငွေ ပေးအပ်တာမျိုး တစ်ခုခုလုပ်ပေးသင့်တာပေါ့၊ ဒါပေမယ့် သူတို့ ထောင်တဲ့ မိုင်းကို နင်းမိတာတောင် နင်းမိသူက ပြန်လျော်ကြေးပေးရမယ်လို့ ပြောနေတယ်၊ ဒေသခံတွေရဲ့ ဘ၀ကတော့ KIA လက်အောက်မှာ ဖိနှိပ်အနိုင်ကျင့် သမျှ ခံနေကြရတာပါဘဲ ” ဟု မိုးမောက်မြို့ခံ သင်းအုပ်ဆရာတစ်ဦးက ပြောကြားသွားခဲ့သည်။

ထိုက်ဇော်