ဂျပန် ခေတ်ဦး အခြေအနေ
သခင်စိုး သည် သခင် သန်းထွန်း၊ ဗိုလ်ချုပ် အောင်ဆန်း တို့နှင့် တိုင်ပင် ပြီး ကိုသိန်းဖေ နှင့် သခင် တင်ရွှေ တို့အား အိန္ဒိယ နိုင်ငံသို့ စေလွှတ် ရန် ဆုံးဖြတ် လိုက် သည်။ ထိုအချိန် တွင် ဂိုရှယ်၊ မစ္စတာနာ့တ်၊ မစ္စတာ ဒေး အစ ရှိသော ကုလား ရဲဘော် များသည် မန္တလေး ထောင်မှ ထွက်လာ ရပြီး နောက် သခင်စိုး တို့နှင့် လူစု ခွဲ ကာ ၁၉၄၂ ခုနှစ်၊ မေလ ၁ ရက်၌ အိန္ဒိယ ပြန်ရန် မုံရွာ ဘက်သို့ ထွက်ခွာ သွားကြပြီ ဖြစ်သည်။ မူကာဂျီ မှာ မူ ကုလား ရဲဘော် များနှင့် လိုက် မသွား ဘဲ ကျန်ခဲ့ သည်။ ကုလား ရဲဘော် များ၏ နိုင်ငံရေး အယူ အဆမှာ ဂျပန် ဖက်ဆစ် ကိုလည်း တိုက် မည်၊ အင်္ဂလိပ် နယ်ချဲ့ သမား များ ကိုလည်း တော်လှန် ပုန်ကန်မည် ဟူသော အယူ အဆ ပင် ဖြစ်သည်။ မြန်မာ နိုင်ငံ ကို ဂျပန် က သိမ်းပိုက် လိုက်သော အခါ ကုလား ရဲဘော်
များ၏ နိုင်ငံရေး အယူ အဆမှာ ဆောင်ရွက် ရန် အခွင့် မသာ တော့ပေ။ ဂျပန် သိမ်းပိုက် ထားသော မြန်မာ နိုင်ငံ သည် ကုလား ရဲဘော် များ၏ စစ်မျက်နှာ နှစ်ဖက်ဖွင့် တိုက်ခိုက် ရမည့် သေနင်္ဂ ဗျူဟာ နှင့် မကိုက် ညီ တော့ပေ။ ယင်း တို့၏ သေနင်္ဂ ဗျူဟာ ကို ကျင့်သုံး ရန် အိန္ဒိယ နိုင်ငံ သာလျှင် လုံခြုံမှု ရှိမည် ဟု ယူဆ သောကြောင့် ထွက်ခွာ သွားကြ ခြင်း ဖြစ်သည်။ * ( * ။ သခင် တင်မြ၏ ဘုံဘဝ မှာဖြင့် (တ) စာမျက်နှာ ၁၆၄။) သခင်စိုး သည် တရုတ် များနှင့် ဆက်သွယ် ကြည့် ရာတွင် အဆင် မပြေ သဖြင့် အိန္ဒိယ နိုင်ငံ ရှိ မဟာမိတ် များနှင့် ဆက်သွယ် ရန် ကြိုးစား လာသည်။ ဂျပန် သိမ်းပိုက်ပြီး ခါစ မြန်မာ နိုင်ငံ ၏ အခြေ အနေမှာလည်း များစွာ ဆိုးရွား လျက် ရှိသည်။ ဂျပန် တို့သည် မော်လမြိုင် ကို သိမ်းပြီး ပါက မြန်မာ့ လွတ်လပ်ရေး ကို ကြေညာ ပေး မည်ဟု ကတိ ထားခဲ့သော်လည်း ဗိုလ်ချုပ် အောင်ဆန်း နှင့် တပ်မတော် ခေါင်းဆောင် များက လွတ်လပ်ရေး ကြေညာ ပေးရန် တောင်းဆို သော အခါ မြန်မာ တစ် နိုင်ငံလုံး သိမ်းပြီး မှ ကြေညာ သင့်သည် ဟု အကြောင်း ပြ ကာ ငြင်းပယ် ခဲ့သည်။ ဘီအိုင်အေ တပ်မတော် ကိုလည်း လူ သုံးထောင် ခန့်မျှ ဖြင့် ကန့်သတ် ထားလို ခဲ့သည်။ သို့သော် ဘီအိုင်အေ အင်အား များစွာ တိုး လာသဖြင့် ချုပ်ချယ် ဖိနှိပ် မှုများ ပြုလုပ် လာသည်။ အင်္ဂလိပ် ခေတ်တွင် အင်္ဂလိပ် အလို တော်ရိ လုပ်ခဲ့ သူများ မှာလည်း ဂျပန် ခေတ် တွင် ဂျပန် အလို တော်ရိများ အဖြစ် သခင် များကို ချောက်တွန်း ခြင်း၊ သူခိုး ဓားပြ များမွေး၍ ဘီအိုင်အေ နာမည် ဖျက်ခြင်း များ ပြုလုပ် လာကြ သည်။ သခင် များစွာ မှာ ဂျပန် စစ်ပုလိပ် တို့၏ သတ်ဖြတ် ခြင်း ကို ခံရ သည်။
ထို့ကြောင့် ဗိုလ်ချုပ် အောင်ဆန်း သည် ဗမာ့ လွတ်လပ်ရေး တပ်မတော် ၏ ဂုဏ်သိက္ခာ အတွက် အောက်ပါ အမိန့် ကို ထုတ်ပြန် ခဲ့သည် -
'ဗမာ့ လွတ်လပ်ရေး တပ်မတော် ၏ ရည်ရွယ် ချက် သည် ဗမာ့ လွတ်လပ်ရေး ဖြစ်သည်။
ဤတပ် သည် ရှမ်း၊ ကရင်၊ ကချင်၊ ချင်း စသည့် ဗမာ တစ်မျိုးသား လုံး အတွက် ဖြစ်သည်။
ထို့ကြောင့် တပ်မတော် ကို အမျိုးမျိုး ကူညီ ကြပါ။
ဗမာ့ တပ်မတော် က မြို့ရွာ များကို စောင့်ရှောက် ကာကွယ် နေသည်။
သေနတ် လက်နက် ရှိသူများ တပ်မတော် သို့ အပ်နှံကြ။
ရှေးက အင်္ဂလိပ် အစိုးရ ထံ ကလဲ့ စားချေ မည့်သူ များကို ကလဲ့ စားချေ မည့် ဆန္ဒမရှိ။
တိုင်းရင်းသား လူနည်းစုများအား ညီရင်း အစ်ကို ကဲ့သို့ သဘော ထားမည်။
လွတ်လပ်စွာ ယုံကြည် ကိုးကွယ်ခွင့် ရှိသည်။
ဗဟို အစိုးရ မဖွဲ့မီ အခွန် မကောက်ရ၊ ကြွေး မပေးရ။
ဂျပန် ငွေစက္ကူနှင့် အင်္ဂလိပ် လက်ထက် ဗမာ ငွေ စက္ကူများ အသုံးပြု နိုင်သည်။
ဗမာ့ တပ်မတော် သားများ၏ အပြုအမူကို တိုင်ကြား လိုပါက တပ်မတော် တပ်ခွဲ များ ရှိရာ တွင် တိုင်ကြား နိုင်သည်။
ဗမာ့ လွတ်လပ်ရေး တပ်မတော် သည် ကြမ်းပိုး၊ သူခိုး၊ ဓားပြ တပ်မျိုး မဟုတ်။
မျိုးချစ် စစ်တပ် ဖြစ်သည်။
ခိုးဝှက် လုယက် သူများ၊ မတော် မတရား ပြုလုပ်သူ များကို စစ် ဥပဒေ အရ အရေး ယူမည်။
လွတ်လပ်ရေး ကို လုပ်မှ ရမည်၊ ထိုင်နေ ၍ မရနိုင်၊
ဗမာ တိုင်း နားလည် ၍ စည်းလုံး ညီညွတ်စွာ ကြိုးစား ဆောင်ရွက်ကြ ရမည်'
စသည် ဖြင့် ပါရှိပြီး ကြေညာ ချက် အောက်တွင် ပုံ၊ ဗိုလ်ချုပ် ဗိုလ်တေဇ၊ ဗမာ့ လွတ်လပ်ရေး တပ်မတော် မှူးချုပ် လက်မှတ် ရေးထိုး ထား သည်။
ဗိုလ်ချုပ် အောင်ဆန်း သည် သခင်နု၊ ဗိုလ် လက်ျာ တို့နှင့် အတူ မေမြို့ တွင် ဒေါက်တာ ဘမော် နှင့် အစိုးရ ဖွဲ့စည်းရေး ဆွေးနွေး ပြီး ဗဟို အစိုးရ ပြင်ဆင် ရေး ကော်မတီ ဖွဲ့စည်း ခဲ့သည်။ ဂျပန် က ဖွဲ့စည်း ပေးသော ဗဟို အုပ်ချုပ်ရေး အဖွဲ့တွင် ဗိုလ်ချုပ် အောင်ဆန်း မပါဝင် ဘဲ ဒေါက်တာ ဘမော်၊ သခင် မြ၊ သခင်နု၊ သခင် ဗစိန်၊ သခင် ထွန်းအုပ်၊ ဒေါက်တာ သိမ်းမောင်၊ ဓားမ ဦးဘသိန်း၊ ဗန္ဓုလ ဦးစိန်၊ ဦးလှဖေ နှင့် ဦးဘဘေ တို့ ပါဝင် ကြသည်။ ဂျပန် တပ်များ ၏ ဗိုလ်ချုပ် ဖြစ်သူ ဂျင်နရယ် အီးဒါး က ဗမာ့ လွတ်လပ်ရေး တပ်မတော် အား အုပ်ချုပ်ရေး ကိစ္စ တွင် ဝင် မစွက် ရန် တားမြစ် ခဲ့သည် ဟု ဆိုသည်။ * ( * ။ သခင် တင်မြ ၏ ဘုံဘဝ မှာဖြင့် (တ) စာ မျက်နှာ ၁၈၆။) သခင်စိုး သည် မန္တလေး ထောင်မှ လွတ်မြောက် ကတည်း က ဂျပန် များနှင့် ဆက်သွယ်မှု မရှိဘဲ လျှို့ဝှက် စွာသာ နေထိုင် လှုပ်ရှား ခဲ့သည်။ ရောက်သည့် နေရာ တွင် စည်းရုံးရေး လုပ်ငန်း ကို ဆောင်ရွက် လျက် ရှိရာ ဖက်ဆစ် ဂျပန် တို့ကို မုန်းတီး နေသော မျိုးချစ် ပုဂ္ဂိုလ် များသည် သခင်စိုး ၏ ဖက်ဆစ် ဆန့်ကျင်ရေး သဘော ထားကို လက်ခံ ယုံကြည် လာကြ သည်။ ဗိုလ် သိန်းတန်၊ သခင် လှထွန်း၊ သခင် တင်ဦး (မကွေး) နှင့် သခင် တင်မြ တို့သည် သခင် စိုး ရေးသား သည့် မြင်းခြံ စစ်တမ်း နှင့် ဖက်ဆစ် ဆန့်ကျင်ရေး စာရွက် စာတမ်း များကို ကူးယူ ၍ လျှို့ဝှက် စွာ ဖြန့်ဝေ ပေးကြ ရသည်။
ဖက်ဆစ် များ၏ ရိုင်းစိုင်း ရက်စက်မှုများနှင့် ပတ်သက် ၍ သခင် တင်မြ က ဘုံဘဝ မှာ ဖြင့် (တတိယ တွဲ) စာမျက်နှာ ၁၉၅ နှင့် ၁၉၆ တွင် အောက်ပါ အတိုင်း ဖော်ပြ ထားသည် ကို တွေ့ရ သည်။ 'မခံချင် စရာ ကောင်း လှသည့် ဂျပန် ဖက်ဆစ်များ ၏ ရက်စက် ယုတ်မာ မှုများကို နေ့စဉ် ပင် အတော မသတ် ကြား နေရ၏။ တောရွာ များက ပျံ့လွင့် လာသော သတင်း များ၊ စစ်ရုံး သို့ အားကိုး တကြီး နှင့် လာရောက် တိုင်ကြား ကြသော အမှု များတွင် မြန်မာ အမျိုးသမီး များ ကို ဂျပန် စစ်သားများက ကာယိ နြေ္ဒ ဖျက်ဆီးခြင်း၊ မုဒိမ်း ကျင့်ခြင်း၊ မိဘ မောင်ဖား ရှေ့တွင်ပင် မရှောင် ပြုကျင့် ခြင်း၊ လူများ ကို ဖမ်းဆီး ရိုက်နှက် ခြင်း၊ ညှဉ်းပန်း ခြင်း၊ သတ်ဖြတ် ခြင်း၊ ဂျပန် ကင်းစောင့်ရှေ့ ဖြတ်သွား သူတိုင်း အား ဆရာ တော်၊ သံဃာတော် များ မကျန် အလေး ပြု စေခြင်း၊ အလေး မပြု ပါက ပါးရိုက် ခြင်း၊ ပြည်သူ လူထု ၏ ပစ္စည်း များကို လုယက် ယူငင်ခြင်း စသည့် သတင်း များ နား မဆံ့အောင် ကြားနေ ရပါ သည်။ အပြစ် ရှိသူ ဟု ထင်တိုင်း နေပူလှန်း သည့် အပြစ် ဒဏ် အမျိုးမျိုး ပေးလေ့ ရှိကြ ပါသည်။
လက်နက်မဲ့ ပြည်သူ လူထု ကိုသာ မဟုတ်၊ လက်နက် စွဲကိုင် ထားသော ကျွန်တော် တို့ ဘီအိုင်အေ တပ်ဗိုလ်၊ တပ်သား များ ကိုလည်း ဖိနှိပ် စော်ကား လေ့ ရှိပေ သည်။ ဗန်းမော် သို့ ရေကြောင်း ချီတက် သွားသော ဗိုလ်မှူးကြီး ဇေယျ* (* ဗိုလ်မှူးကြီး ဇေယျ - ရဲဘော် သုံးကျိပ်ဝင်၊ တောခို ကွန်မြူနစ်၊ ကျဆုံး။) ကို ဂျပန် စစ်သား များက ပါးရိုက် ခြင်း၊ အချို့ နေရာ များတွင် ဘီအိုင်အေ တပ်များ မှ လက်နက် များ သိမ်း၍ ဖမ်းဆီး နှိပ်စက်ခြင်း၊ စစ်ကိုင်း တွင် မကြာ ခဏ ဘီအိုင်အေ တပ်သား များကို ရိုက်လွှတ် လေ့ ရှိခြင်း စသည် တို့ ဖြစ်ပွား နေပါ သည်။ ** (၁။ သခင် တင်မြ၏ ဘုံဘဝ မှာဖြင့် (တတိယ ပိုင်း) စာမျက်နှာ ၁၉၅၊ ၁၉၆။) ကွန်မြူနစ် များသည် ဖက်ဆစ် ဂျပန်များ အား နိုင်ငံ တကာ ကွန်မြူနစ် တို့၏ အယူ အဆ နှင့် အညီ ဆန့်ကျင် တိုက်ခိုက်ရန် ကြိုးစား နေ သကဲ့သို့ ဗိုလ်ချုပ် အောင်ဆန်း နှင့် တပ်မတော် ခေါင်းဆောင် များမှာ လည်း ဖက်ဆစ် ဂျပန် တို့အား တော်လှန် တိုက်ခိုက်ရန် ဆုံးဖြတ် ပြီး ဖြစ် နေသည်။ ဗိုလ် သိမ်းဆွေ သည် ပုသိမ် တွင် ကက်သလစ် ခရစ်ယာန် ဘုန်းတော်ကြီး များ၏ ခြေထိုး မှု ကြောင့် ဂျပန် ကင်ပေတိုင်* (*ဂျပန် ကင်ပေတိုင် - ဂျပန် လျှို့ဝှက် စစ်ပုလိပ် အဖွဲ့။) တို့၏ ဖမ်းဆီးခြင်း ကို ခံခဲ့ရ သည်။ ဗိုလ်သိမ်းဆွေ သည် ဂျပန် လက်မှ လွတ်သော အခါ ရန်ကုန် သို့ သွား၍ ဗိုလ်ချုပ် အောင်ဆန်း အား တိုင်ကြား ခဲ့သည်။ ဗိုလ်သိမ်းဆွေ ကိုယ်တိုင် ရေးသား သည့် လွတ်လပ်ရေး တိုက်ပွဲ စာမျက်နှာ ၁၃၇ တွင် ဗိုလ်ချုပ် အောင်ဆန်း ၏ ပြောကြား ချက်ကို အောက်ပါ အတိုင်း တွေ့ရသည်။
''မင်းတင် မဟုတ် ပါဘူး ကွယ်၊ ပဲခူး မှ သခင်တင် တို့ ထွက်ပြေး လာခဲ့ ရတယ်၊ ဒီ ဂျပန် တွေက တို့ကို သစ္စာဖောက် တယ်၊ မော်လမြိုင် ကျရင် လွတ်လပ် ရေး ကြေညာ မယ် ဆိုပြီး မကြေညာ ခဲ့ဘူး၊ လက်နက် ချပေး ပြီး မြေအောက် တော်လှန်ရေး လုပ်ဖို့ ဟာလည်း ချ မပေး ခဲ့ဘူး၊ ဒါကြောင့် တို့ ပိုပြီး အရေးကြီး လာပြီ၊ ညီညီ ညွတ်ညွတ် နဲ့ လွတ်လပ်ရေး ရအောင် ဆောင်ရွက်ရ မယ်၊ သည်းခံ ပြီး စစ်တပ် ဖွဲ့စည်းပြီး မှ ခုခံ တိုက်ခိုက် နိုင် မှာကွဲ့၊ တို့ အကျဉ်း အကျပ် ထဲ ရောက်နေပြီ၊ လူထု ကလည်း သိတာ မဟုတ်ဘူး၊ ဂျပန် မဟာမိတ် ဆိုပြီး ကြို ဆိုကြ၊ အခွင့် အရေး သမားတွေ ကလည်း ရာထူး လိုချင် ကြနဲ့ကွယ်၊ ဒါ မဆန်း ပါဘူး'' ** ( ** ။ ဗိုလ်သိမ်းဆွေ - လွတ်လပ်ရေး တိုက်ပွဲ စာမျက်နှာ ၁၃၇။) ဗိုလ်ချုပ် အောင်ဆန်း နှင့် တပ်မတော် ခေါင်း ဆောင် များသည် ဖက်ဆစ် ဂျပန် တို့အား တော်လှန် တိုက်ခိုက် ရန် တပ်မတော် တစ်ရပ် ထူထောင် ထားဖို့ လိုကြောင်း ယူဆ ကြသည်။ ထို့ကြောင့် ဖက်ဆစ် ဂျပန် များ၏ ဖိနှိပ် ချုပ်ချယ်မှု များ အကြားမှ ဘီအိုင်အေ တပ်မတော် အား တိုးချဲ့ ဖွဲ့စည်းခြင်း၊ လက်နက် ခဲယမ်း စုဆောင်း ခြင်း၊ စစ် ပညာ သင်ကြား လေ့ကျင့်ခြင်း တို့ကို ဆောင်ရွက် လျက် ရှိသည်။ ထို အချိန် တွင် သခင်စိုး သည် သခင် တင်ရွှေနှင့် ကိုသိန်းဖေ (သိန်းဖေမြင့်) အား ရခိုင် မှ တစ်ဆင့် အိန္ဒိယ သို့ စေလွှတ်ရန် ရွေးချယ် လိုက်လေ သည်။
ကိုသိန်းဖေ နှင့် သခင် တင်ရွှေ အိန္ဒိယ သို့ ထွက်ခွာ သွားခြင်း
သခင်စိုး၊ သခင် တင်မြ၊ သခင် တင်ရွှေ နှင့် ကိုသိန်း ဖေ တို့သည် သခင် တင်မြ ၏ ဇာတိ ဖြစ်သော ဓနုဖြူမြို့ သို့ ရောက်လာ ကြသည်။ ယင်း တို့ လူစုမှာ မြစ်ဝကျွန်း ပေါ်ဒေသမှ ရခိုင် ဒေသ သို့ကူးရန် ရည်ရွယ် ထားကြ သည်။ ထို့နောက် ဟင်္သာတ၊ ငါးသိုင်းချောင်း၊ သာပေါင်း နယ်များ သို့ လှေ တစ်တန်၊ မော်တော် တစ်တန် ဖြင့်သွား ပြီး ရခိုင် ရိုးမကို ခြေကျင် ဖြတ်ကျော် ကြရာ ဘောမိမှ တစ်ဆင့် ဂွချောင်း သို့ ရောက်သွား ကြသည်။ ဂွမြို့မှ တစ်ဆင့် သံတွဲ သို့ ခရီးဆက် ပြန်သည်။ ထိုအချိန် တွင် ဗိုလ် ရန်အောင် (သခင် လှမြိုင်) ဦးစီးသော ဘီအိုင်အေ တပ် မှာ ပြည်မြို့ မှ တစ်ဆင့် တောင်ကုတ် လမ်း အတိုင်း ရခိုင် တိုင်း မြောက်ပိုင်း သို့ ရောက်ရှိ နေပြီ ဖြစ်သည်။ သခင်စိုး တို့ လူစု သည် ဗိုလ်ရန်အောင် နှင့် တွေ့ဆုံ ရန် ကြိုးစား ကြသည်။ သခင်စိုး တို့ လူစု ခရီးထွက် လာရာ တွင် သခင် တင်မြ သည် ဘီအိုင်အေ စစ်ဌာနချုပ် မှ ဖြစ် သဖြင့် တပ်များ စစ်ဆေးရန် အကြောင်းပြ အယောင် ဆောင်ပြီး ထွက်လာ ကြခြင်း ဖြစ်သည်။
သခင်စိုး တို့ လူစု သည် ၁၉၄၂ ခုနှစ်၊ ဇူလိုင်လ ၈ ရက် တွင် မင်းပြား မြို့သို့ရောက် သွားပြီး ဘီအိုင်အေ တပ် နှင့် တွေ့ဆုံ သည်။ ထို အချိန် တွင် ဗိုလ် ရန်အောင် သည် စစ်တွေ သို့ ရောက်ရှိ နေသည်။ ဗိုလ်ရန်အောင် ၏ ဘီအိုင်အေ စစ်ကြောင်း သည် ၁၉၄၂ ခုနှစ်၊ ဧပြီလ ၁၂ ရက် တွင် ပန်းတောင်း မြို့နယ် သလဲတန်း သို့ ဆိုက် ရောက်ကာ ရခိုင် ရိုးမကို ကျော်ဖြတ် ကြသည်။ ဧပြီလ ၁၈ ရက် တွင် တောင်ကုတ် သို့ ရောက်ပြီး မင်းပြား သို့ ဧပြီလ ၂၈ ရက် တွင် ရောက်ရှိ နေကြခြင်း ဖြစ်သည်။ ဗိုလ်ရန်အောင် ဦးစီး သော ဘီအိုင်အေ တပ်သည် ကုလား တန် မြစ်ဘေး ရှိ ပုဏ္ဏားကျွန်း မြို့ကို သိမ်းပိုက် ပြီး စစ်တွေ မြို့သို့ ခြေကျင် ချီတက် သွားကြ သည်။ ကျောက်တန်း ရွာ တွင် အင်္ဂလိပ် တပ်နှင့် တိုက်ပွဲ ဖြစ်ပြီး အင်္ဂလိပ် တပ်များ ဆုတ်ခွာ သွားသော အခါ ၁၉၄၂ ခုနှစ်၊ မေလ ၇ ရက်တွင် ဘီအိုင်အေ တပ်က စစ်တွေ မြို့ကို သိမ်းပိုက် နိုင်ခဲ့သည်။
ဘီအိုင်အေ တပ်သည် ဂျပန် တပ်များ ထက် ဦးစွာ စစ်တွေ မြို့ကို သိမ်းပိုက် နိုင်ခဲ့သဖြင့် ဘဏ်တိုက် မှ ငွေ ၂၂ သိန်း နှင့် လက်နက် ခဲယမ်း အမြောက် အမြား ကို ရရှိ လိုက်သည်။ သခင်စိုး တို့ လူစုသည် မင်းပြား တွင် ရခိုင် နိုင်ငံရေး ခေါင်းဆောင် များ ဖြစ်ကြသော ကိုဘဇံ၊ ဗုံပေါက် သာကျော်၊ ကိုစံရွှေ၊ ကိုလှကျော် စသော ပုဂ္ဂိုလ် များနှင့် ဆွေးနွေး ကြသည်။ ထို့နောက် စစ်တွေ မှ ပြန် ရောက် လာသော ဗိုလ်ရန်အောင် နှင့် သခင်စိုး တို့လူစု ဆွေးနွေး ကြသည်။ သခင်စိုး က ဗိုလ်ရန်အောင် ထံမှ ဖက်ဆစ် ဆန့်ကျင်ရေး မြေအောက် လုပ်ငန်း အတွက် အလှူခံရာ ဗိုလ်ရန်အောင် က ငွေငါးသောင်း လှူဒါန်း ခဲ့သည်။ ကို သိန်းဖေ နှင့် သခင် တင်ရွှေ အိန္ဒိယ သို့ သွားရောက် ရေး အတွက်လည်း စား စရိတ် ငွေ တစ်ထောင် ကူညီ ခဲ့သည်။ * ( * ။ သခင် တင်မြ၏ ဘုံဘဝ မှာဖြင့် (တ) စာ မျက်နှာ ၃၄၈။)
သခင်စိုး တို့ လူစု သည် ဖက်ဆစ် ဆန့်ကျင်ရေး အတွက် အသေးစိတ် ဆွေးနွေးပြီး ကို သိန်းဖေ နှင့် သခင် တင်ရွှေ တို့ အိန္ဒိယ သို့ ချောမောစွာ ရောက်ပါက အိန္ဒိယ ရေဒီယို မှ 'ညိုထွန်း တို့လူစု မိဂဒါဝုန် သို့ ရောက်ရှိ ကြ ပြီ' ဟု အသံလွှင့် ရန် ညှိနှိုင်း ကြသည်။ ထို့နောက် သခင် စိုး နှင့် သခင် တင်မြ သည် ကို ညိုထွန်း (ဝန်ကြီး ဟောင်း)၊ ကို ဘဇံ နှင့် ကိုစောဦး တို့ကို ခေါ်၍ မင်းပြား မှ ပြန်လာ ခဲ့ကြသည်။ ထို့နောက် ကို ညိုထွန်း တို့သုံးဦး သည် သံတွဲ တွင် ဗိုလ် ရန်အောင် ကို စောင့်ပြီး ကျန်ရစ် ခဲ့ကြ သည်။ သခင်စိုး နှင့် သခင် တင်မြ သည် သံတွဲ တွင် ဦးကျော်ရင် (မန္တလေး တက္ကသိုလ် ပါမောက္ခ ဟောင်း) နှင့် တွေ့ဆုံ ပြီး ဖက်ဆစ် ဆန့်ကျင်ရေး ကိစ္စ ဆွေးနွေး ပြန် သည်။ ထို့နောက် ဂွမြို့ မှ တစ်ဆင့် မြစ်ဝကျွန်း ပေါ် ဒေသ ကို ဖြတ်သန်း ပြီး ရန်ကုန် သို့ ရောက်လာ ကြသည်။ ရန်ကုန် သို့ ရောက်ရှိ လာသော အခါ မြေအောက် လှုပ်ရှား မှုများ ကို ဆက်လက် လုပ်ကိုင် တော့သည်။
သခင် တင်ရွှေ နှင့် ကိုသိန်းဖေ သည် ၁၉၄၂ ခုနှစ်၊ ဇူလိုင် လ ၁၂ ရက်တွင် မင်းပြား မှ ပလက်ဝ ဘက်သို့ ခရီး ဆက်ကြ သည်။ ပလက်ဝ နယ်မှ ခြေကျင် ခရီး ဖြင့် နယ်စပ် ကို ဖြတ်ကျော် ပြီး စစ်တကောင်း နယ် သို့ ဝင် သည်။ ပထမ ပုလိပ် အဖွဲ့ နှင့် ဆက်သွယ် ပြီးနောက် စစ် တပ် နှင့် ဆက် သွယ် ရာ အဖမ်းခံ ကြ ရပြီး ကာလ ကတ္တား မြို့မှတစ်ဆင့် ဒေလီ မြို့သို့ ရောက်သွား ကြသည်။ ဗြိတိသျှ အာဏာ ပိုင်များ သည် ကိုသိန်းဖေ တို့ တင်ပြ သမျှကို လက်မခံ ဘဲ စစ် သတင်း များသာ စစ်ဆေး မေးမြန်း ကြသည်။ နယူး ဒေလီ တွင် အကျယ်ချုပ် ဖြင့် ငါးလ ကြာမြင့်စဉ် အတွင်း ကိုသိန်းဖေ သည် အင်္ဂလိပ် ဘာသာ ဖြင့် (What Happened in Burma) (ဗမာ ပြည်မှာ ဘာဖြစ် ခဲ့သလဲ) စာအုပ်ကို ရေးသား ခဲ့သည်။ ထို စာအုပ် ကို အိန္ဒိယ ကွန်မြူနစ် ပါတီ က စာအုပ် အဖြစ် ရိုက်နှိပ် ဖြန့်ချိ ပေးပြီး သတင်း အဖြစ် လည်း ကမ္ဘာ သို့ ဖြန့်ပေး ခဲ့သည်။
ကိုသိန်းဖေ နှင့် သခင် တင်ရွှေ ကို ဗြိတိသျှ အာဏာ ပိုင်များ က နယူး ဒေလီမြို့တွင် ငါးလ ကြာမျှ အကျယ် ချုပ်ဖြင့် ထားပြီး ဆင်းမလား သို့ ပြောင်းရွှေ့ ပြန်သည်။ ဆင်းမလား တွင် ဗမာပြည် ဘုရင်ခံ ဒေါ်မန် စမစ် ခေါင်းဆောင် သော ဗမာပြည် ဆိုင်ရာ အင်္ဂလိပ် စစ်ပြေး အစိုးရ ရှိနေ သည်။ ကို သိန်းဖေ တို့ နှစ်ဦး သည် အင်္ဂလိပ် စစ်ပြေး အစိုးရ နှင့် အဆင် မပြေ ခဲ့ပေ။ ထို့ကြောင့် ဆင်းမလား မှ နယူး ဒေလီ သို့ ပြန်လာ ကြပြီး ဗြိတိသျှ ပြန်ကြားရေး ဝန်ကြီး ဌာနခွဲ တွင် ဖက်ဆစ် ဂျပန် ဆန့်ကျင် ရေး လုပ်ငန်း များကို ဝင်ရောက် ကူညီ ခဲ့သည်။ ရေဒီယို မှ ဖက်ဆစ် ဂျပန် ဆန့်ကျင်ရေး သဘော ထားများ ဟောပြော ကြပြီး လေနတ်သား သတင်း စာတွင် ဆောင်းပါး များ ရေးသား ခဲ့ကြ သည်။ အိန္ဒိယ ကွန်မြူနစ် ပါတီ နှင့်မူ အဆက် အသွယ် မှန်မှန် ရရှိ ခဲ့ကြ သည်။
၁၉၄၃ ခုနှစ်၊ ဇန်နဝါရီ လတွင် ကိုသိန်းဖေ တို့ အိန္ဒိယ ရောက်စက တိတ်တဆိတ် ဆက်သွယ် အကြောင်း ကြားခဲ့သော တရုတ်ပြည် သမ္မတ ချန်ကေရှိတ် ၏ အကြံပေး အရာရှိ ဂျင်နရယ် ပီအက်စ်ဝမ် * ( * ဂျင်နရယ် ပီအက်စ်ဝမ် - သခင်စိုး နှင့် သခင်နု အား မန္တလေး ထောင်မှ ခေါ်ထုတ် သွားသူ။) ၏ တောင်းဆို ချက် ဖြင့် ဗြိတိသျှ အစိုးရ က ကိုသိန်းဖေ နှင့် သခင် တင်ရွှေ ကို ချန်ကင်း သို့ ပို့ပေး သည်။ ထို အချိန် တွင် ချန်ကေရှိတ် အစိုးရ သည် ဂျပန် ကို ဟန်ပြသာ တိုက်ခိုက် နေပြီး မော်စီတုန်း ၏ ကွန်မြူနစ် များ ကိုသာ အဓိက ထား ထိုးနှက် နေစဉ် ဖြစ်သည်။ ချန်ကေရှိတ် အစိုးရ က သခင် တင်ရွှေ နှင့် ကိုသိန်းဖေ ကို မည်သည့် အကူ အညီမျှ မပေး ခဲ့ပေ။ သို့သော် တရုတ် ကွန်မြူနစ် ပါတီ ခေါင်းဆောင် တစ်ဦး ဖြစ်သော ချူအင်လိုင်း နှင့် တိတ်တဆိတ် ဆွေးနွေး ခွင့် ရခဲ့သည်။ ချူအင်လိုင်း က ဖက်ဆစ် ဆန့်ကျင် ရေး အတွက် ပြည်တွင်း အင်အား ကိုသာ အဓိက ထားရန် အကြံ ပေးခဲ့ သည်။ ** ( ** ။ သခင် တင်မြ ၏ ဘုံဘဝ မှာဖြင့် (စ) ၂၉၇ မှ ၃ဝ၁ ။)
ကိုသိန်းဖေ နှင့် သခင် တင်ရွှေ ချန်ကင်း၌ ရှိစဉ် အင်္ဂလိပ် စစ်ဘက် ဆိုင်ရာ က ဝင်းဂိတ် ၏ ခရီးရှည် ထိုး ဖောက် စစ်ဆင်ရေး တွင် ပါဝင် ရန် သွေးတိုး စမ်း မေးမြန်း ခဲ့ သည်။ မဟာမိတ် များ သည် မြန်မာ ပြည်ရှိ ဖက်ဆစ် ဆန့်ကျင်ရေး အင်အားစု များအား ယင်း တို့၏ သူလျှို များ၊ သတင်း ပေးများ၊ ဒေသခံ တပ်ဖွဲ့ဝင် များ အဖြစ်သာ အသုံးပြု လိုခြင်း ဖြစ်သည်။ ကိုသိန်းဖေ နှင့် သခင် တင်ရွှေ က ဝင်းဂိတ်၏ စစ်ဆင်ရေး ကို ငြင်းပယ် ပြီး အိန္ဒိယ သို့ ပြန်လာ ကြသည်။ အိန္ဒိယ ရောက်သော အခါ မြန်မာ ပြည် ရှိ ဖက်ဆစ် ဆန့်ကျင်ရေး အင်အားစု များအား အကူ အညီ ပေးသင့်ကြောင်း ဗြိတိသျှ အစိုးရ ထံ စာဖြင့် တင်ပြ ပြန်သည်။ ဗြိတိသျှ စစ်တပ် များသည် မြန်မာ ပြည် ပြန်သိမ်းရေး အတွက် ယင်း တို့၏ အစီအစဉ် ဖြင့်သာ အောင်မြင် ရန် ကြိုးစား နေကြ သည်။ ထို့နောက် မြန်မာ ပြည်တွင်း နိုင်ငံရေး အင်အားစု များ၏ အကူ အညီ မရဘဲ မြန်မာ နိုင်ငံ အား သိမ်းပိုက် ရန် မဖြစ် နိုင်ကြောင်း သိလာ မှ သခင် တင်ရွှေ ကို မြန်မာ ပြည် သို့ ပြန်လည် စေလွှတ် လိုက်သည်။ * ( * ။ ၎င်း (စ) ၂၉၆ မှ ၃ဝ၂ ။) သခင် တင်ရွှေ သည် မြန်မာ ပြည် သို့ လျှို့ဝှက်စွာ ပြန်လည် ရောက်ရှိ လာပြီး မြေအောက် လုပ်ငန်း လုပ်နေ သော သခင်စိုး တို့ လူစုနှင့် ညှိနှိုင်း ဆွေးနွေး ပြန်သည်။ ထို့နောက် မမြရီ နှင့် လက်ထပ် ၍ မမြရီ ကိုပါ ခေါ်ပြီး အိန္ဒိယ နိုင်ငံ သို့ ပြန်လည် ထွက်ခွာ သွားခဲ့သည်။ ကွန်မြူ နစ်များ ၏ ပြည်ပ ဆက်သွယ်မှု မှာ ပထမ ပိုင်းတွင် အောင်မြင်မှု မရ ခဲ့သော်လည်း နောက်ပိုင်း တွင် အသင့် အတင့် အောင်မြင် လာသည်။ တရုတ် ကွန်မြူနစ် ပါတီ၊ အိန္ဒိယ ကွန်မြူနစ် ပါတီ တို့နှင့် လည်း အဆက် အသွယ် ကောင်းမွန် လာသည်။ သို့သော် မြေအောက် ကွန်မြူနစ် ပါတီဝင် များ သည် ကွန်မြူနစ် ပါတီ၏ အရေး ကို ဆောင်ရွက်ခြင်း ထက် အခြား ခေါင်းဆောင် များ နည်းတူ ဖက်ဆစ် ဆန့်ကျင်ရေး ကိုသာ ဦးစားပေး ဆောင်ရွက်ခဲ့ ကြ ခြင်း ဖြစ်လေ သည်။
ဆက်လက် ဖော်ပြ ပါမည် ...
No comments:
Post a Comment